د خوراک اثرات

ډېرو ماشومانو ته د معدې او کولمو مسئلې (لکه قبض، د معدې تکليف، ګېس،پړسېدل او کوم خوراک نه الرجي) لګېدلې شي۔ په دې اړه ډېر خلک متفق نه دي خو بيا هم ځيني مور پلار د ماشوم د خوراک لپاره کېسين (يعنې هغه پروټين چې په پيو کښې وي) يا ګلوټن (په غنمو کښې موجود پروټين) ويستلو سره د دې په نخښو کښې ښه والے محسوسوي۔

داسې خوراک ته ګلوټن فري کېسېن فري خوراک وئيل کېږي۔ د دې کوم نقصان نشته خو بيا هم دا خوراک به د غذائيت د يو ماهر په نګرانۍ کښې اخستل وي۔

د (GFCF) مطلب دا دے چې د خپلو ماشومانو د خوراک نه کېسين (کوم چې د پيو نه جوړ ټولو خوراکي شيانو کې وي) او ګلوټن ( چې د غنمو جوړ خوراکي موادو کې وي) لرې کول۔ د دې لپاره پۍ، پنير، ماسته، پاستا، ډبل ډوډۍ او آئس کريم وغېر نه پرهېز ضروري دے۔ د دې سره سره په دې اړه هم احتياط ډېر ضروري وي چې ماشوم کوم تيار خوراک خوري ځکه چې په دې کښې هم ګلوټن او کېسين والا اجزا کېدې شي۔ د مثال په توګه برګر، مايونيز، چټني يا ساس او تر دې چې د مکهن يا کوچو نه هم پرهېز کول ضروري شي۔ په دې اړه د خوراک لېبل کتل ډېر ضروري دے ځکه چې د (GFCF) فائده به هله وي چې کله د دې ټولو پروټيونو نه پرهېز وشي۔ په باقاعده توګه د دې د وئيلو لپاره ثبوت يا دليل نشته خو څېړنې وايي چې د (GFCF) خوراک شپږ مياشتو لپاره که ماشوم ته په باقاعدګۍ سره ورکړل شي نو د ډېرو ماشومانو د وئيلو، غصې او د دورې راتللو مسئلې کمېدې شي۔ ياد ساتئ چې دا ضروري هم نه ده چې د دې خوراک په ذريعه د آټزم ښکار ټولو ماشومانو ته فائده ورسي او د دې اثر په هغه ماشومانو وي څوک چې د همېشه غذائي مسئلو سره مخ وي۔

خو د دې لپاره د غذائيت د يو ماهر نګراني هم په دې وجه ضروري ده چې هغوي تاسو ته د خوراک منصوبه بندي درکوي او دا باور کوي چې ستاسو ماشوم ته متوازن يعنې د ضرورت مطابق خوراک ملاويږي۔ (GFCF) خوراک محدود هم کېدې شي او که چرې په مناسب ډول په دې عمل ونه شي نو د ماشومانو د غذائيت کمے پېدا کېدې شي۔ د غذائيت يو ماهر يا پوه تاسو ته د ملټي وټامن يا نورو د طاقت د دوائۍ مشوره درکولې شي۔