کھانے کےوقت کے لیے کچھ مشورے

یہ معلوم کریں کہ کہیں آپ کے بچے کوخورا ک والی مشکلات دوسرے مسائل (جیسے معدے کے تیزاب کا خوراک کی نالی اور منہ میں آنا اوردانتوں میں خالی جگہ)کی وجہ سے تو نہیں ہیں۔ اس کے لیے کسی ڈاکٹر سے رابطہ کریں۔

کھانے کے وقت کو بچے کے لیے فکر سے پاک بنائیں۔ اکثر بچہ خوراک سے متعلق ڈر اور الجھن کا شکار ہوتا ہے اور والدین زبردستی کھلانے کے چکر میں معاملہ اور خراب کر دیتے ہیں۔ کھانے کے وقت سے پہلے کوئی پُر سکون عادت(جیسے گہرے لمبے سانس لینا) اپنانے سے آپ اپنے بچے کے ڈر اور الجھن کو کم کر سکتے ہیں۔

ایک فیملی کی طرح اکٹھے بیٹھ کر کھانا کھانے سے آپ بچے کو اشارے سے بتا سکتے ہیں کہ کھانے کے وقت کیا کرنا چاہیے۔ آٹِزم سےمتاثرہ بچے روٹین کا خیال رکھتے ہیں۔ لہٰذا ان کے ساتھ ایک ہی ٹیبل پر بیٹھنے سے آپ کھانے کو ان کی روٹین میں شامل کر دیتے ہیں یہاں تک کہ وہ ایک عادت بن جاتی ہے۔ بچے نقل کرنے سے بھی سیکھتے ہیں۔ اس لیے جب آپ کا بچہ دوسروں کو کھانا کھاتا دیکھے گا تو وہ آسانی سے خود بھی کھا سکے گا۔

آٹِزم سے متاثرہ بچے اکثر جسمانی وضع کا خیال نہیں رکھ پاتے اور اکثر ان کے پیٹ کا درمیانی حصہ اور کمر کے پٹھے کمزور ہوتے ہیں۔ ایسے میں وہ کھانے کے وقت جھک کر بیٹھتے ہیں جس سے انھیں نگلنے اور ہضم کرنے میں مشکلات کا سامنا کرنا پڑ سکتا ہے۔ کھانے کے وقت بچے کی کمر کو تکیوں کا سہارا دینے کی کوشش کریں یا اس کے پاؤں اونچے کرنے کے لیے نیچے پائےدان رکھ دیں۔

آٹِزم سے متاثرہ بچوں کے لیے خوراک کا ڈر بہت اہم ہوسکتا ہے۔ کچھ کو پھلوں کے رنگ خوف زدہ کر دیتے ہیں تو کچھ کو ان کی ساخت پسند نہیں آتی۔ ان غذاؤں کو بچے کی خوراک میں شامل کر کےاس خوف پرقابو پایا جا سکتا ہے۔ مثال کےطور پر آپ پہلے اسے اس غذا کی موجودگی میں پر سکون رہنا سکھائیں گے، پھر اسے کانٹے سے وہ چیز پکڑنا سکھائیں گے اور آہستہ آہستہ ہاتھ سے پکڑنے کی ترغیب دیں گے۔

جیسا کہ پہلے ذکر کیا گیا ہے، آٹِزم سے متاثرہ بچے روٹین کو پسند کرتے ہیں۔ کھانے کے اوقات کے درمیان کھاتے رہنے سے منع کر کے آپ انھیں کھانے کے وقت بھوک مٹانے پر مائل کر سکتے ہیں۔

اگر آپ کا بچہ کسی خاص طرح کی خوراک ہی برداشت کرتا ہے تو اس کی برداشت میں رہ کر کھانے میں چھوٹی چھوٹی تبدیلیاں لائیں۔ مثال کے طور پر اگر آپ کا بچہ پہلے ہی سپیگٹی پسند کرتا ہے تو اسے ساس کے ساتھ سپیگٹی دیں۔ اس طرح آپ اس کی پسند کی خوراک کے ساتھ ساتھ کھانے میں نئی چیزیں شامل کر سکتے ہیں۔ اس چیز کا خیال رکھیےکہ یہ تبدیلیاں چھوٹی اور آہستہ ہونی چاہئیں۔ نئی غذائیں چکھنے میں بچے کی حوصلہ افزائی کیجیے۔